Хугархай далавч

Их удаан гүйсэн

2012-02-12T18:06:00.000+08:00

Анх... Би нэг их удаан гүйж билээ. Хамаг бодол санаа орвонгоороо эргээд жаргаж байгаа нарны туяа нүдийг минь гялбуулан, газар дэлхий дайвалзан ногооноороо эргэлдэх тэр агшинд баярласандаа, бүр хагартлаа баярласандаа учиргүй гүйж билээ. Цагаан судалтай цэнхэр цамц минь салхинд дэрвэж, би агаарын чимээнээр улам догдолсон. Их удаан гүйсэн.

Тэртээх алсын оддоос хэдэн зуун сая жилийг туулан ирсэн амьгүй гэрлийн долгион болоод бөөм бүр нь эмэгтэй хүний турьхан гар болон хувирч мөрөн дээр минь аяархан тогшсоноо "хүүе.. зүгээр үү??" хэмээн асуусан. Би үүнийг нь сонсоогүй боловч зүгээр л ойлгож орхисон, гайхсандаа гэнэт зогтусан арагшаа эргэж харахад ард минь хэдэн хуурай мөчир хоорондоо хэлхэлдэн түүдэг болон асч хөгжилдөж байсан юм даа.

Мухар сүсэгтэн, мунхаг үзэлтэнгүүд

2012-01-31T15:10:00.000+08:00

"Үс сахландаа баригдсан нүдний шил болсон есөн өвгөн эрдэмтэн өөр өөрсдийн зохиосон машиндаа суужээ. Хутга жад, араа соёогоор тоноглогдсон хүүхдийн тоглоомон машины дайтай өнөөх төхөөрөмжүүд нь харахад сүртэй бөгөөд бүгд хоорондоо дайтан тулалдаж, нэгнийгээ алснаар хамгийн сүүлд үлдсэн нэг нь ялагч болох аж. Дунд сургуулийн биеийн тамирын зааланд цугласан бүхэн тэднийг дэмжин уухайлахын зэрэгцээ тэдний дотор таньдаг хүмүүс олон харагдах юм.

Тэмцээн эхлэхийн алдад бүгд дуугаа хураан амьсгаа дарахтай зэрэгцэн би чанга дуугаар ийн өгүүлэв. "Юм гэдэг хоёр талтай. Энэ мэт ухаантай хүмүүсээ бид алж хядахаас урьтаж сайн сайхан зүйл бүтээлгэн ашиглахаа бодох ёстой. Та нар харин мухар сүсэг, мунхаг шашныхаа харгайгаар энэ эрдэмтдийн амь насыг хороож байгаа нь муу зүйл" гэв.

Ингэж хэлсний дараахан заалны гэрэл унтарч таг харанхуй болов. Хаалганы тэндээс бололтой нэгэн эмэгтэй хэн сая хэлэв хэмээн ориллоо. Би хэсэг чимээгүй байснаа "Би" гээд өөрийнхөө нэрийг хэлэхэд заал тэр чигээрээ инээлдлээ.

Гэрэл ассаны дараа зааланд гэрийн буурийн чинээ хоёр газар бензин асган тойрог гал асаав. Гэтэл нэгэн цэнхэр даашинзат охин гарч ирснээ миний эсрэг үг хэлээд, үзэл бодолдоо үнэнчээ бататган гал дотор орж бүжиглэв. Гартаа мөн тамхи барьсан агаад даашинзных нь хормойд галын дөл асан дүрэлзэхэд тэвчээр заан бүжиглэсээр шатаж үхэв. Дахин хоёр охин, нэг залуу мөн гарч ирэн үг хэлээд галд орж шатаж үхцгээв. Гайхалтай нь тэд үхлээс огт айхгүй бөгөөд шатаж түлэгдэх үедээ зовлонгоо мэдэгдүүлэхгүйг хичээн ганц ч орилсонгүй нь гайхалтай.

Энэ бүхнийг үзээд миний сэтгэл санаа уймран айдаст автаж энэ бузар шашны цуглаанаас хурдхан зайлъя хэмээн сэмээрхэн гэтсээр хаалганд дөхөн очоод гарахыг завдтал өнөөх чанга дуут эмэгтэй бугуйнаас минь зууран авав. Харин нэгэн настай эрэгтэй "наадахаа явуулчих" гэсэнд өнөөх эмэгтэй "хоолыг нь өгөөд явуулъя" гэсэнд настай эрэгтэй "өөрөө иднэ" гэж хэлэхэд эмэгтэй намайг тавьж явуулав.

Өнөөх аймшигт газраас зугтан гарсандаа туйлын ихээр баярлан машин зам гараад алхаж байтал сайн найзтайгаа тааралдав. Түүнтэй элдвийг ярин алхсаар явтал түүний гэдэс өлссөн бололтой нэг газар орж хоол идье гэв. Би ч мөн адил өлссөн байсан тул дуртайяа зөвшөөрөн ойрхон нэгэн ресторанд орон хоолны цэс харан захиалах хоолоо товлочихоод зөөгчийг дуудах санаатай эргэн хартал нүдэндээ ч итгэсэнгүй. Өнөөх зааланд байсан хүмүүс тэр чигээрээ тэнд ирсэн байх агаад бүгд над руу харж байв. Би сандран хар хурдаараа хаалга руу гүйтэл хаалга цоожтой, өнөөх эмэгтэй, эрэгтэй хоёр над руу чиглэн алхаж айсуй"

гэж зүүдлэн сэрэв. Цаг харахад өглөөний 4:40 бөгөөд энэ явдал зүүд байсанд хязгааргүй ихээр баярлав. Өдөр нь нэгэн хэрүүлч хадагтайтай мухар сүсэгтэн, мунхаг үзэлтэнгээр нь дуудан месенжэрээр хэрэлдэж байснаа санав.

Өөрийгөө ялан дийлсэн нэгэн гайхамшигт түүх

2011-12-14T15:15:00.001+08:00

Хамаг бие сульдан хүндэрч, нүд аажмаар анилдаж эхлэв. Энэ бол муугийн дохио. Тэсээрэй, тэсээрэй, үүнийг л давчих юм бол бүх зүйл сайхан болно хэмээн өөртөө итгүүлэн шүд зуув. Ухаан бодол минь балартан зэрэглээтэж, хүндээр амьсгаадан хараа сунгах боловч дэмий л бүрэлзэнэ. Ус... ус.. надад одоо цэл хүйтэн ус хэрэгтэй байна, намайг аврах зүйл ганц аяга ус юм шиг санагдаад эргэн тойрноо ажлаа, дусал ч ус алга.. ус авчрах газар дэндүү хол, очоод авахад хөл тэртээ тэргүй хөдлөх тэнхэлгүй байлаа.

Байдал улам дордлоо. Нүд хагас аниатай гөлийж, зөвхөн гарын хуруунууд л хөдөлж байв. Нүдээ л аних л юм бол би энэ ертөнцөөс одож, өөр ертөнцөд сэрнэ гэдгээ мэдэж байлаа. Чих дүнгэнэн, бодол аль эсвэл зүүд нь мэдэгдэхгүй элийрлүүд толгойд орж ирнэ. Хүйтэн ус, ус ус... тэр нэгэн зун голын эрэг дээр цэв хүйтэн усаар нүүрээ угаагаад эрэг дээр нь үүлнээс дүрс хайн хэвтэж байсан минь санаанд орох шиг... голын урсгалд нарны гэрэл тогтож ядан далбилзаж, эгээтэй л алмааз эрдэнэсээр урсаад байна уу гэлтэй харагддагсан..

Би нүдээ анилаа. Харанхуй, гэхдээ яг ч харанхуй биш өнгө намайг бүрхэн авч чихэнд юу ч сонсогдохоо болин юу юугүй алмаазан голын эрэг дээр очихын алдад... би... нүдээ нээлээ. Сүүлчийн хүчээ шавхан, яг л алтайн хүрэн бүргэд олз руугаа дайрах мэт шийдэмгий, дайчин, зоригтойгоор нүдээ нээлээ.

Ингээд ширээн дээрээс аягаа авч цайны өрөө орж хүйтэн ус уугаад, 00 орж нүүрээ угаагаад нойр сэргэвээ...

Унадаг дугуй

2011-11-24T18:41:00.000+08:00

Заа ёстой баларсаан, ёстой баларсан юм боллоо, ёстой бүтэхгүй юм боллоо, арай ч дээ, харамсаад харамсаад барахгүй нь, манай ажлын гадаа хогийн савны хажууд нэг шоргоолж үхцэн байшдээ энэ тэр...

Гэхдээ нэг сонин юм тохиолдов өнөөдөр. Бүхэл бүтэн хоёр жилийн ажил амь наана там цаана дээсэн дөрөөн дэнжигэнэж байна. Ийм үед бас сонин л байдаг юм байна, ойрд мэдрээгүй мэдрэмж юм байна, мэдрээд суугаад байхаар сайхан л юм байна, сайхан гэдгийг нь гайхах л юм байна, гайхсныхаа дараа гутрах л юм байна гээл гээл гээл

Алдсан алдаан дээрээ дөрөөлж амжилт руу улам ахидаг гэдэг байхаа, тэрэнд итгээл тэнэг царайлаад хана ширтээл хамраа маажаал суужийшд, гэснээс тийм ч сүртэй юм биш л дээ...гэхдээ л дандаа бүх юм дардан замаар явна ч гэж юу байхав.

Стийв Жобс ч өвчнөөр нүд анилаа, ааайпод маань ч зуурдаар өөд боллоо, хөгжим сонсож явахгүй болохоор элдэв дээдийн юм бодогдоод, сайн сайхан санаа ч зурсхийх юм, саар муухай бодол ч торсхийх юм, тэрийгээн тэгээд тэнэг блог дээрээ тэрлэюүүү гэтэл аль хэдийн мартагдсан байлаа, адаг сүүлд нь ийм л юм бичиж сууна шүү дээ...

Шөнийн тэнгэрийг ажсан шигээ цас руу шээж зогсоход согтуу эр цаана нь нар сарны тухай дуу дуулаал, долоон бурхан од тоож байгаа ч юм байхгүй гэрэлтээл доохно нь талд нь амнаас гарсан уур үүл болох гэж мөрөөдөөл..

Утаатай өвөл минь ирлээ дээ. Утаа ч одоо зуны шиврээ бороо, намрын шар навчис, хаврын ээнэг өдрүүд шиг л зүрх сэтгэлд минь өвлийг төлөөлөөд удаж байна даа. Түүнтэй хамт утаан дунд хөтлөлцөж алхсан улаанбаатарын романтик үдшийг санахуй нтр... шинэхэн костюмтай хархүү шинэ жилийн цэнгүүнээс хөлчүүхэн гарч ирээд утаан дунд уусан одов оо нтр, бүсгүй хүний ялдам үнэр суунаг утаатай холилдохюуяа бүх ертөнцийн цэцэгсийг нийлүүлсэн ч түүнээс илүү анхилуун тансаг үгүй билэ нтр хахах за юу л солиороод байна даа

За ямартай ч энэ хөгийн асуудлыг яаж ийж байгаад шийдэхийг бодно, болохгүй бол дахиад эхлэнэ ээ, яадаг юм, залуу хүнд зав мундсан биш ямартай ч би явж байна, бээжин сууж байна гээл бага багаар урагшилна даа. Аа тийн, амьдрал гэдэг унадаг дугуйтай адил, чи хөдлөхгүй л бол тэнцвэрээ алдана гэж агуу айнштайн хэлсэн байдым шүү, зүтгээд бай залуусаа

Намар юу мэдэрдэг бол...

2011-10-13T12:36:00.004+08:00

Намар юу мэдэрдэг бол. Нас нь гүйцэж амь тавьсан шар навчсаа өрөвддөг юм бол уу. Нар нь харьж үүлс нь уйлагнасан саарал өдөртөө гунидаг юм бол уу. Сүүлчийн борооны эцсийн дуслаа хаана унагаадаг бол. Гурван сарын нас байна гэсэн эмчийн үгэнд итгэж ядсандаа эмнэлгийн үүдэн дээр гөлөрч зогсоо эрийн мөрөн дээр үү. Зуны жаргалтай өдрүүд нь зуурдын байсанд гунигласан бүсгүйн нүдэн дээр үү. Зүгээр л цасыг мөрөөдөн намраас уйдсан дэвэргэн охины инээмсэглэл дээр үү. Намар гуниг хоёрыг мартаад хуримын ордны хаалгаар хөтлөлцөн орсон хосуудын уруул нийлэх цэг дээр үү.

Намар юу мэдэрдэг бол. Насны тоо нь гүйцэж харих хоногоо хүлээж суугаа хөгшчүүдийг өрөвддөг юм бол уу. Нарны сайхныг илүү ч атугай мэдрүүлчихийн тулд налайсан өдрүүдээ найр тавин бэлэглэдэг юм бол уу. Өнгө, мөнгөний араас хөөцөлдөөд, өөрийгөө хаанаас ирсэн гэдгийг мартчихаад, нар сар, бороо цасны сайхныг мэдрэхээ байгаад халуун, хүйтэн, шавар шавхай, хальтиргаа гулгаа гэдэг үгнээс өөр тэднийг илэрхийлж чадахаа болисон хүмүүс бидэнд гомддоггүй юм бол уу.

Намар юу мэдэрдэг бол. Зун залгаад шууд өвөл байсныг торгоох гэж, хамгийн сүүлд үлдсэн хэнз цэцэгний хагдарч дуусахыг хүлээх гэсэндээ, моддын навчисанд жам ёсных нь үхлийг үзүүлэх гэсэндээ, зун орж амжаагүйдээ гомдоллосон борооны дуслуудыг баярлуулах гэсэндээ, зүгээр л хүмүүст уй гунигийг төрүүлэх гэсэндээ, өнгөт орчлонгийн шар өнгө нь дутахвий гэсэндээ, өвөл ирэхэд бэлэн бай хүмүүсээ гэсэндээ намар чи энд байгаагаа мэддэг үү. Намайг удахгүй орхиод явна гэсэндээ гунидаг уу.

...

2011-09-14T18:36:00.000+08:00

Утсан дээрх шаазгай

Нэгэн сайхан өглөө

2011-08-20T01:49:00.001+08:00

Нэгэн сайхан тунгалаг өглөө байжээ. Гэгээхэн, цэлмэг, нар дөнгөж мандаад өвсний шүүдрийг гялбуулан, сэрүүхэн цэнгэг агаарт шувууд жиргэсэн сайхан өглөө байжээ.

Нэгэн сайхан өглөө байжээ. Шөнийн бороо татраагүй шивэрсээр, үүл сууж сааралтаад, хамаг бүгд угаагдан өнгө орсон ч цаанаа уйтгартай дүнсийгээд.. чийг даагаад, шалбааганд гарсан машины дугуйн мөр аажим замхарсан тийм л сайхан өглөө байж гэнэ.

Нэгэн сайхан өглөө байжээ. Утаанд таван алхмын цаадах харагдахтай үгүйтэй, амнаас уур, тамхины утаа ээлжлэн суунаглаад, энд тэнд шар хантаазтангууд тонголзоод, цас шүүрдэх чимээ сонсогдоод, цас орох чимээ сонсогдохгүй, цас чахрах чимээ сонсогдоод, сонсоод, сонсогдоод, бүгд чахруулаад, бүгд өөр өөрийн хэмнэлтэй, түгжээнд хахсан зам машины сигнаалд дөжрөхдөө өөртөө мөсөн дуулга хийж зугаацсан тийм сайхан өглөө байжээ.

Нэгэн сайхан өглөө байжээ. Тэнд би байхгүй, тэнд хүн байхгүй, нүд алдам тал, амар амгалан, сүрдэм, бахдам, чив чимээгүй, үүнийг мэдрэх гэж, царцаа хүртэл нэг минут дуугаа хураадаг, салхи хүртэл анир гаргах вий гэж өвсний толгойг илээд өнгөрдөг тийм сайхан өглөө байж гэнэ.

Нэгэн сайхан өглөө байжээ. Хотын гудамж ажилдаа яарсан хүмүүсийн хөлд талхигдаад, хотын гудамж хичээлдээ яарсан оюутнуудын хөлд үнгэгдээд, хотын гудамж хаа нэгтээгээс няслагдаж ирсэн тамхины ишэнд оногдоод, хотын гудамж хаа сайгүй нүргэлэх дуу чимээнд бүүвэйлэгдээд...шинэхэн баригдсан цэцэрлэгт хүрээлэнгийн будаг нь хатаагүй модон сандал дээр жиндүүхэн хоносон тэнүүлч эр нар хараад баярласан тийм л сайхан өглөө байж гэнэ.

Нэгэн сайхан өглөө байжээ. Утасны сэрүүлэг нэгэн сайхан ая дуу эгшиглүүлээд, удалгүй өнөөх нь тамын дуу болж хувираад, ажил таслах тухай зүүд, бодлоо ялгаж ядан нойрмогдуухан тэмтчиж сэрсэн тийм сайхан өрөвгөр өглөө байжээ.

За удахгүй нэгэн сайхан өглөө ирэх нь.. унтъя

Мэдэхгүй нэг ийм юм биччлээ

2011-08-05T15:53:00.001+08:00

Нэг тийм алсад байгаа том хар бөмбөлөг. Миний хажууд хоёр метр өндөр шар өнгийн шоо байна. Бас цэв цэнхэрээр будсан пирамид. Дээд үзүүрийг нь хутгаар хусч будгийг нь арилгасан бөгөөд цаанаас нь саарал өнгө дэвсгэртэн харагдах юм. Саваа гэлтэй урт нарийхан цилиндр босоогоороо байна. Өнгө нь хүрэндүү ба сайхан толигор.

Том хар бөмбөлгийн наахантай тун чиг ямар өнгөтэйг нь үл мэдэх хэлбэргүй бие байна. Бидний мэдэх хэлбэр биш ч өөрийн гэсэн хэлбэртэй байна. Сайн харвал бүр нэр өгч ч болмоор санагдана. Энэ хэлбэргүй хэлбэртэнтэй очиж юм яримаар санагдав.

Хажууд нь дөхөж очоод яриа өдлөө.

Сайн байна уу?
Сайхан зусч байна уу?

Хэлбэргүй хэлбэртэн дуугүй л байх юм. Хар бөмбөлөг цаанаас үл мэдэг инээмсэглэлээ. "Үхэл" гэж би хар бөмбөлөгт хэлэв. Шоо тэндээс "би айж байна" гэв. Пирамидийн өнгө солигдсон байв. Тэр чигээрээ саарал болов.

Би ч гэсэн айлаа. Гагцхүү хэлбэргүй хэлбэртэн айхгүй байгааг мэдэж байв. Түүнээс суралцмаар санагдана. Тэр чимээгүй.. Хэлбэргүй байдлаараа хэлбэр бүтээсээр л..

Гэнэт саваа "Би архи уумаар байна" гэж орилов. Пирамидыг саарал болсон үед архи ууж болохгүй. Энэ бол дүрэм гэж би хэлэв. Пирамид ихэнхдээ хөх өнгөтэй байх бөгөөд дан саарал байх нь ховор юм. Өнөөдөр онцгой өдөр бололтой.

Аа гэхдээ саваанд тамхи өгснийг энд дурдах хэрэгтэй.

Шоо бол миний амьдралдаа бүтээсэн цорын ганц зүйл юм. Олон хүмүүс шоог мэддэг ч намайг бүтээсэн гэдгийг гадарлах ч үгүй яваа. Би шоог улам том болгохыг хүсч байна. Хэдий жижиг ч миний амьдралд бага ч гэсэн гэрэл гэгээ, утга учрыг бэлэглэж байгаад нь би баярладаг. Шоог би бүтээсэн ч шоо намайг сургаж байна.

Хар бөмбөлөг бага багаар ойртсоор. Хэзээ нэгэн цагт би түүнд "Сайн байна уу?" гэж хэлэх ч надаас өмнө олон хүн хэлэх биз. Хэн нэгэнд улам ойртсоныг мэдэхэд аймаар. Хэлбэргүй хэлбэртэн надад туслаач...

Энэ мэт элдэв явдлын дундуур ганц хоёр конус явж өнгөрөх нь сонин. Конус бол сайхан биет мөн боловч хажуунаас нь харахад гурвалжин, дээрээс нь харахад дугуй харагддаг учир таньж мэдэхэд хэцүү. Конусыг өнгөрөөхгүй байх оролдлого залхуутай, заваан ажил мэт санагдах болов.

Эдгээр биетүүд бүгд л өөрийгөө төгс хэлбэрийг олсон мэт бодох нь бий. Бүгд өөрийнхөө хэлбэрийг бусадтай харьцуулна. Бүгд өөрийнх нь хэлбэртэй адил байх ёстой мэт санана. Харин хэлбэргүй хэлбэртэн бол өөр. Тийм болохоор би түүнд хайртай.